Категорија: Македонија
Театарски перформанс во режија на Нина Николиќ на 7-ми мај во Битола
Како дел од прославата за 9 Мај – Денот на победата над фашизмот, ќе биде и театарскиот перформанс во режија на Нина Николиќ, а кој ќе биде изведен во рамки на концертот „Еден ден на војната“ на 7-ми мај во Битола на Широк Сокак со почеток во 19:30 часот.
Нина Николиќ е млада режисерка чии поставки се познати и надвор од Македонија. Особено голем успех бележи со претставата која е во копродукција на Македонскиот народен театар и Скопје филм-студио, „Разговори во четири очи“. Со оваа претстава беа срдечно пречекани и во Русија – првото гостување се случи на крајот на минатата година во Санкт Петербург, а второто беше во февруари оваа година во градот Чељабинск.
„До гостување во Русија дојде така што бевме селектирани на два меѓународни фестивала „АртОкраина“ и „ЧелоВек театра“ за кои имаше отворена апликација. Откако уметничките совети и селекторите на двата фестивала проценија дека нашата претстава ги задоволува потребните уметнички и програмски критериуми отпатувавме во Русија. Руската публика има посебна почит кон театарските уметници и кон она што се прикажува на сцената, така што претставува посебно убаво искуство да се настапува таму. Претставата беше одлично прифатена и реакциите на оние со кои имавме можност да продискутираме нѐ направија горди и среќни“ – вели Нина Николиќ.
За 7-ми мај, заедно со Катина Иванова, Дарја Ризова и Благој Веселинов подготвија краток приказ за херојството на македонските партизанки во НОБ. „Еден ден на војната“ закажан за 7-ми мај во Битола е во организација на Амбасадата на Руската Федерација и Почесниот руски конзулат во Битола.
Акција „Георгиевска лентичка“ на концертот во Битола
На 9 Мај се одбележува Денот на победата над фашизмот.
По тој повод, Амбасадата на Руската Федерација во Република Македонија и Почесниот руски конзулат во Битола организираат концерт „Еден ден на војната“. Концертот ќе се одржи на 7-ми мај во 19:30 часот на Широк Сокак. Како дел од овој настан е и Здружението на младите руски сонародници „Русичи“, организација што обединува младинци кои имаат потекло од Русија, а живеат во Република Македонија.
Според претседателот на „Русичи“, Ирена Гуржовска, една од позначајните акции во кои тие се вклучуваат е и „Георгиевската лентичка“. Оваа акција се спроведува од 2005 година во Руската Федерација, а денес се спроведува во повеќе од 30 земји низ светот. Акцијата „Георгиевска лентичка“ подразбира делење на Георгиевски ленти со портокалова и црна боја, каде што портокаловата боја означува пламен, а црната – дим. Пред 9ти мај, Денот на победата над фашизмот, се закачуваат Георгиевски лентички на облеката во знак на почит и сеќавање на сите војници-херои коишто учествувале во Втората Светска Војна. Георгиевската лента за прв пат се сретнува уште во времето на Екатерина Втора и била дел од од воениот орден на свети Ѓорѓи Победоносец, кој прв пат бил доделен во 1769 година.
„Георгиевската лентичка е препознатлив симбол за Денот на победата – 9 Мај и оваа акција се случува секоја година во Македонија. Годинава, овој симбол ќе биде поделен и на концертот „Еден ден на војната“ во недела на 7-ми мај во Битола. Со оваа акција ќе се присетиме на жртвите во Втората Светска Војна. Мотото на оваа акција е „Јас паметам, јас се гордеам“ – вели Гуржовска.
